Малтинчен кая ан юл, кайрине хыçа ан хăвар

Кукашнири пĕтĕмĕшле пĕлÿ паракан вăтам шкулта пурнăç вĕресе кăна тăрать. Кунта вĕренекенсем «Чи маттур класс» ята илес тесе ăнтăлаççĕ. Тимлесе вĕреннисĕр пуçне ачасем тĕрлĕ ăмăртусемпе конкурссене.усăллă та пархатарлă ĕçсене хаваспах хутшăнаççĕ. Шкул директорĕ –  Геннадий Васильевич Филимонов пуçарса янипе кашни уйăхра ачасен ĕçне пĕтĕмлетсе хак параççĕ.

Акă хăйсене пур енчен кăтартуллă тытса, «Кĕнекемĕрсене упрар» тата «Шкул тумĕ» рейдсене, çăмăл атлетсен «Космос çулĕпе», «Нацисен кросĕ» спорт ăмăртăвĕсене  хутшăнса 4-мĕш тата  11-мĕш классем 3-мĕш хут малти вырăна тухрĕç. Куçса çÿрекен кубока тивĕçрĕç. Калас пулать, ку та шкулти çĕнĕлĕх.

Ытти классенчи ачасем те вĕсенчен юласшăн мар. «Ылтăн кĕр уявĕ» балра  кашни класс ушкăнĕ хăйĕн пултарулăхне  кăтартрĕ. Марина Волкова(10кл.), Михеева Анастасия(9«а»), Кузьмина Алена(9»б») «Кĕр пики» ята тивĕçрĕç. Каччăсенчен ăмăртусенче Родионов Александра(11кл.) çитекен пулмарĕ.

«Ман юратнă аннем» литература конкурсĕнче Такмакова Екатерина(4кл.) сăвви, Колесникова Алина тата Короткова Екатерина ÿкерчĕкĕсем пурин кăмăлне кайрĕç. Сăвă-калав шăрçалас район шайĕнчи ăмăртура Кольчугина Маргаритăпа(6кл.) Печникова Светлана(11кл.) лауреат ята илчĕç.

Ашшĕ-амăшĕ те шкул пурнăçĕпе кăсăклансах тăрать. Вĕсене шкулта час-часах курма пулать: ывăл-хĕрĕн вĕренĕвне те тĕрĕслеççĕ, вĕрентекенсемпе те канашлаççĕ, ачисемпе пĕрлех спорт ăмăртăвĕсене те хастар хутшăнаççĕ.

 Халĕ вăтам тата аслă классенче вĕренекенсем тĕрлĕ предметпа пыракан район олимпиадисенче хăйсен пĕлĕвне кăтартаççĕ. Çăв вăхăтрах ватăсене пулăшма та, тĕрлĕ экскурсие çÿреме те ĕлкĕреççĕ Кукашни шкул ачисем .

Умра – Çĕнĕ çул! Аван кĕтсе илесшĕн ăна пирĕн шкулти вĕренекенсем.

Иванова Ксения,

Кукашнири пĕтĕмĕшле пĕлÿ паракан

 вăтам шкулăн 10-мĕш класĕнче вĕренекен